ԱՄՆ կոնգրեսականները դատապարտել են Ադրբեջանի ագրեսիան եւ Լեռնային Ղարաբաղի հասցեին հնչող շարունակական սպառնալիքները
04.02.2012, 16:12
ԱՄՆ Ներկայացուցիչների պալատի անդամներ Ֆրենկ Վուլֆը եւ Ջուդի Չուն հիշատակել են Բաքվի եւ Սումգայիթի հայկական ջարդերը` նախորդ շաբաթ ելույթ ունենալով Կոնգրեսում:
Մասնավորապես, կոնգրեսականները դատապարտել են Ադրբեջանի ագրեսիան եւ Լեռնային Ղարաբաղի հասցեին հնչող շարունակական սպառնալիքները, տեղեկացնում է Ամերիկայի Հայ դատի գրասենյակը (ANCA):
Իր ելույթում կոնգրեսական Վոլֆը նշել է, որ «Խորհրդային Միության փլուզումից հետո շատ շուտով Ադրբեջանի եւ Լեռնային Ղարաբաղի հայերը մեծ դժվարություններ են տեսել, այդ թվում` Սումգայիթի (փետրվար, 1988), Կիրովաբադի (նոյեմբեր, 1988) եւ Բաքվի (հունվար, 1990) ջարդերը:
Վոլֆը նաեւ մեջբերել է Bloomberg News-ում վերջերս տպագրված հոդվածը, որում ասվում է, որ Ադրբեջանը ժամանակակից զենք է գնում, որպեսզի հնարավորություն ունենա «վերադարձնել Լեռնային Ղարաբաղի ինքնավարության նկատմամբ վերահսկողությունը»:
«Ագրեսիայի նման գործողությունները աղետալի հետեւանքներ կունենան»,- ընդգծել է կոնգրեսականը:
Իր հերթին Ջուդի Չուն գործընկերներին հիշեցրել է, որ «1988-1990թթ. ընկած ժամանակահատվածում հայ բնակչությունն Ադրբեջանում կոտորածների է ենթարկվել, որոնք ազգային հողի վրա են կատարվել: Հարյուրավոր հայեր սպանվել եւ վիրավորվել են Սումգայիթի, Կիրովաբադի եւ Բաքվի հարձակումների ընթացքում»:
Օրենսդիրն անհանգստություն է հայտնել, որ բռնություն ծնող տրամադրություններն Ադրբեջանում նախկինի պես շարունակվում են:
